يا أهلاً بكل متابعينا الأعزاء! كما تعودنا كل سنة، مع اقتراب الموسم الدرامي الأهم في الوطن العربي.
بتبدأ ملامح خريطة مسلسلات رمضان 2026 تظهر في الأفق، والسنة دي الحقيقة المنافسة شكلها هتبقى “نار” والرجوع هيكون للأوزان الثقيلة.
في البداية لو عايز تعرف مين اللي حجز مكانه ومين اللي هيفاجئنا، المقال ده معمول علشانك.
أولاً عودة الثنائيات المنتظرة: ياسمين عبد العزيز وكريم فهمي
طبعاً الخبر اللي تصدر كل محركات البحث هو عودة النجمة ياسمين عبد العزيز بعد غياب.
ياسمين بتقدم السنة دي مسلسل “وننسى اللي كان”، والمفاجأة إنها بترجع للتعاون مع النجم كريم فهمي.
الثنائي ده ساب بصمة كبيرة عند الناس قبل كدة، والمرة دي داخلين بجرعة رومانسية ودرامية مكثفة، والكل مراهن إن المسلسل ده هيكون “تريند” رقم 1 من أول يوم.
حاتم صلاح في رمضان 2026.. هل يبتعد عن عباءة “نفادي” في مسلسله الجديد؟
ثانياً الأكشن والتشويق مع “الريس” و”درش”
الجمهور اللي بيحب الأكشن مش هيفوته السنة دي أعمال تقيلة:
- عمرو سعد: داخل الماراثون بمسلسل “الريس”، وبحسب التسريبات، العمل بيقدم قصة شعبية بإنتاج ضخم جداً وتصوير في أماكن مختلفة، وعمرو مراهن فيه على الشخصية اللي بتلمس ولاد البلد.
- مصطفى شعبان: كما عودنا ديما بيكون له “تاتش” خاص في رمضان، بيشارك بمسلسل “درش”.
- مصطفى قرر السنة دي يغير جلده شوية ويقدم دراما اجتماعية فيها لمحة إنسانية بعيداً عن الفورمة التقليدية، وده مخلي الجمهور متشوق جداً.
مصطفى شعبان في درش هيلعب دور مختلف لانه هيفقد الذاكرة، اللي هتخلي حياته في علاقات وزيجات متعددة داخل إطار درامي شعبي مليء بالمفاجآت.
درش مكون من 30 حلقة،ومن إنتاج سينرجي للمنتج تامر مرسي وتأليف محمود حجاج، وإخراج أحمد خالد أمين
ثالثاً المفاجأة الكبرى: ماجد الكدواني يقتحم الدراما
بعد سنين من التركيز في السينما، النجم الكبير ماجد الكدواني بيقرر يدخل بيوتنا في رمضان بمسلسل “سنة أولى طلاق”.
ماجد الكدواني قيمة فنية كبيرة، ووجوده في خريطة رمضان 2026 بيضيف ثقل فني للموسم كله، والعمل بيناقش قضايا زوجية بأسلوب اجتماعي ساخر وراقي جداً.
رابعاً الرعب والخيال.. هل من منافس لـ “المداح”؟
طبعاً بالتأكيد مفيش رمضان من غير “صابر المداح”. النجم حمادة هلال مكمل معانا في “المداح – الجزء السادس”. رغم إن البعض كان فاكر إن القصة خلصت،
لكن النجاح الجماهيري الكبير فرض وجود جزء جديد، ومعاه تحديات و”جن” من نوع جديد هيخلينا ننام والنور شغال كالعادة!
خامساً الكوميديا والضحك من القلب
الكوميديا السنة دي ليها نصيب الأسد، وأبرزها مسلسل النجم كريم محمود عبد العزيز اللي لسه بيستقر على الاسم النهائي، بالرغم من ان التوقعات بتقول إنه هيكون في إطار “الفانتازيا الكوميدية” اللي كريم تميز فيها مؤخراً وبقت علامته المسجلة.
نصيحة لمتابعينا
عمومًا المنافسة السنة دي مش سهلة، والمنتجين بدأوا التصوير بدري جداً عشان يضمنوا جودة الصورة والتمثيل.
إحنا في مجلتنا هنكون معاكم لحظة بلحظة، وهنقلكم الأخبار الحصرية من داخل “اللوكيشن” وأول بروموهات المسلسلات فور صدورها.تفتكروا مين النجم اللي هيقدر يخطف “لقب الأفضل” في رمضان 2026؟
